"ینگی رئیس هم کیلدی"

"ینگی رئیس هم کیلدی"

عنایت الله فرهمند
کابل
طنز توپلمی
اوزبیک بدیعی نثری اثرلرنی آزلیگی یازوچیلر آره سیده سیزیلماقده
یقینده اوزبیک یازوچی محمد حلیم یارقین نینگ "ینگی رئیس هم کیلدی" دیگن کتابی چاپ دن چیقدی
اوشبو کتاب 13 قیسقه طنزلردن تشکیل تاپکن و طنزلرده اساسآ عایله اعضاسی، قوشنی، اورتاق و ایشداشلر آره سیده گی یقین علاقه لر و کولگولی حالتلر بیلن بیرگه آدملرنی اوزی فرقیگه بارمه ی، باشقه لرنی بیزاوته قیله یاتکن معمالرهم کونگولگه باتم یدیگن بیر شکلده یاریتیلگن
طنزلرنینگ بیریده بیر عایله ده گی آته و باله لرنینگ مهر و محبتی و کیکسه کیشی لرگه بولگن حرمتی گه قوشمچه کونده لیک فعالیتلر جریانیده عایله ده یوز بیره دیگن کولگولی حالتلر جوده نزاکت بیلن بیان ایتیلگن
شو بیلن بیرگه اولکه ده گی سونگی ییللرده یوز بیرگن سیاسی و حربی حادثه- واقعه لر و اهالی آره سیده گی قیینتچیلیکلر طنز شکلیده آچیقلنگن
هرچند هر بیر کولگولی طنز آرتیده جامعه ده گی جدی بیر مسئله نی یاتکنی سیزیلیب توریبدی اما ایریم طنزلر بیر آز اوزون بولیب، طنز یا قسقه ایرتکلرنینگ قاعده سیدن چیققنی سیزیله دی
ایریم طنزلرده، طنزنینگ اساسی بیلگی لری (واقعه لرنی کیتمه- کیت یوز بیریشی) اورنیده فقط گینه بیر واقعه اوستیده کوپراق تاختلگن. اوشبو مسئله ایسه بعضی طنزلرنی اوقیشگه باشله ش بیلن طنزنینگ سونگی نتیجه سینی انگلب آلیش گه سبب بولگن
عمومآ آلگنده اوشبو توپلمده گی اوزون طنزلردن کوپراق، قیسقه طنزلر جوده چیرایلی و کولگولی عنصرلرنی اوز ایچیده آلگن
طنز نمونه سی
محمد حلیم یارقین
میرزا اکه سفرگه کیتماقچی بولیب، باله لرینی چقیریب، اولردن:
- سفردن قیتیشیده، سیزلرگه نیمه ساوغات کیلتیره ی؟ دیب سوره بدی
باله لر و عیالی بیر آواز بیلن: بیزلرگه "تره" کیلتیرینگ! دیب ایتیبدیلر
شونده میرزا اکه اینگ کیچیک کینجه تای اوغیلچه سینی ایرکه له تیب:
- قوزیچاغیم، سیزگه نیمه کیلتیره ی؟ دیب سوره بدی
اوغیلچه سی شیرین و یاقیملی سیس بیلن:
- آته جان، بیزگه ساغ- سلامت بخیر باریب کیلسنگیز، اوزینگیز "تره" سیز، دیبدی!!
ینگی رئیس هم کیلدی
اوزبیک بدیعی نثری
بدیعی نثر اثرلر یره تیش افغانستانده گی اوزبیک ایجادکارلری آره سیده آز بولگن اما سونگی ییللرده اوشبو کمچیلیک اوزبیک یازوچیلری تمانیدن سیزیلیب، بو توغریده بعضی بیر جدی آدیملر کوتاریله باشله گن
جاری (1386) ییلی دوامیده تورتته بدیعی نثر اثرلر مثال بیلن "همه گپ پولده" یازوچی نورالله آلتای نینگ اثری، "ینه کوریشگونچه" یازوچی و شاعر شفیقه یارقین نینگ اثری، باله لر اوچون بولگن "چومچوقچه" و "نی تیلماجی" ناملی مولانا نینگ "مثنوی معنوی" سیدن بیر نیچه حکایه لرنینگ بدیعی نثری ترجمه سی یازوچی و ژورنالست رحیم ابراهیم جنابلری تمانیدن اوزبیک تیلیگه اوگریلیب، بیرین- کیتین باسیب چیقاریلدی
اوشبو مسئله ایریم یازوچیلر آره سیده اوزبیک بدیعی نثر ترماغیده آز بولسه هم سیلجیش و حرکتلر تاپیلگنیدن امیدلر توغدیرگن
"ینگی رئیس هم کیلدی" دیگن طنز توپلمی ایسه محمد حلیم یارقین جنابلری نینگ ایککینچی بدیعی نثر اثری سنله دی. اوشبو توپلم افغانستان قلم انجمنی تمانیدن 1000 جلدلیک سانده باسیب چیقاریلگن
جاری ییل باشیده هم یازوچی نینگ "وکالت دغدغه لری" اسملی بیر طنز توپلمی هم نشر ایتیلیب، اوقوچیلر قولیگه ایتیب بارگن ایدی
اثر بیلگیلری:
- عنوان: ینگی رئیس هم کیلدی
- یازوچی: محمد حلیم یارقین
- نشر ایتوچی: افغانستان قلم انجمنی
- چاپ ییلی: کوز فصلی – 1386
- باسیلیش نوبتی: بیرینچی
- تیراژ: 1000
- باسیلگن ییری: افغانستان- کابل